Тасарық ауылдық округіне қарасты Тасарық ауылының үлкен-кіші тұрғындары Рамазан айындағы шапағаты ерекше мол Қадір түнін «Ұлдар ана» мешітінде көпшілік болып қарсы алды. Ауылдағы Т.Тоғысбаев атындағы жалпы орта мектептің 1987-1988 жылғы түлектері біркісідей ұйымшылдық танытып, Қадір түнін есте қаларлықтай етіп өткізді. Бұл кеште лотерея билеті таратылып, ойын ұйымдастырылды. Ұтысқа шаңсорғыш, кілем сияқты тұрмыстық заттар тігілді. Ойынға қатысқан көпшілік қауым ең басты үміті – Умра қажылыққа баруға жолдама ұтып алу болды. Қадір түнінде бұл қуанышқа Мирас Абаев кенелді.
Қадір түнінде «Ұлдар ана» мешітінің имамы Жалалхан Қажы Махмудов, ауыл қариясы Бектұрсын Абаев имандылық тақырыбында әңгімелер айтып, көпшілік қойған сауалдарға жауап қайтарды, бұл игі істі ұйымдастыруға ұйытқы болған ауыл азаматтарына алғыс айтып, ақ баталарын берді.
С.ҚОНЫСБАЕВ.
Тасарық ауылы.
