Өнегелі отбасы – облыс жеңімпазы

Отбасы – тәрбиенің алтын бесігі, ұлттық құндылықтардың негізі. Берекелі шаңырақтағы өзара сыйластық пен татулық ұрпақ тәрбиесіне тікелей әсер етеді. Отбасы күніне орай Түркістан қалалық мәдениет үйінің ұйымдастыруымен «Отбасы – ұлттың тірегі» атты облыстық байқау өтті.
Отбасы құндылықтарын дәріптеп, ұлттық салт-дәстүрді насихаттаған байқауға облыстың әр өңірінен өнерлі әрі өнегелі отбасылар қатысты. Шараның ашылуында Түркістан қаласы әкімінің орынбасары Мадияр Әліпов және «Әділет» партиясы Түркістан облыстық филиалы төрағасының міндетін уақытша атқарушы Халима Жантөреева сөз сөйлеп, қатысушы отбасыларға сәттілік тіледі.
Байқау барысында отбасылар өз әулетінің тарихын, шаңырақтағы қалыптасқан дәстүрі мен отбасылық ұстанымдарын таныстырып, өнерлері мен шеберліктерін ортаға салды. Қатысушылар үш кезең бойынша сынға түсті.
«Отбасым – мақтанышым» кезеңінде әулет тарихы мен отбасы құндылықтары таныстырылса, «Ата-баба дәстүрі – тәрбиенің бастауы» кезеңінде ұлттық салт-дәстүрлерден көрініс көрсетіліп, қолөнер бұйымдары ұсынылды. Ал «Ас мәзірі» кезеңінде қатысушылар ұлттық тағамдар мен күзгі өнімдерден әзірленген тағам түрлерін таныстырды.
Байқаудың әр кезеңінде отбасылар өздерінің ұйымшылдығы мен шығармашылық қабілетін, ұлттық салт-дәстүрге деген құрметін көрсетті. Берекелі шаңырақтағы өзара сыйластық пен бірлікті дәріптеу де байқаудың мазмұнын аша түсті.
Сайыс қорытындысында бас жүлде жерлестеріміз Кендірбаевтар отбасына бұйырды. Осылайша ауданымыздың атынан қатысқан өнегелі отбасы облыстық деңгейдегі байқауда топ жарып, жеңімпаз атанды.
Кендірбаевтар отбасының бұл жетістігі – шаңырақтағы татулық пен бірліктің, ұлттық құндылықтарға деген құрметтің жарқын көрінісі. Облыс төрінде аудан намысын абыроймен қорғаған отбасының жеңісі – баршаға ортақ қуаныш.

«Төлеби-ақпарат».