Қарттар қамқорлықта

Қарттар күніне орай Түркістан облысында аға буын өкілдеріне құрмет көрсетуге, олардың денсаулығын нығайтуға және әлеуметтік қолдау көрсетуге бағытталған «Бір дәуірдің мөлдіреген жастары едік» атты облыстық апталық өтуде.

Апталық аясында қарттардың денсаулығына көңіл бөліп, медициналық қызметтердің қолжетімділігін арттыру мақсатында бірқатар іс-шара ұйымдастырылуда. Сонымен қатар шаралар арқылы ұрпақтар сабақтастығын нығайтып, үлкенге құрмет көрсету дәстүрін дәріптеу көзделген.

Апталықтың алғашқы күні «Денсаулық керуені» акциясымен басталды. Осыған орай медициналық мамандардан құралған мобильді топ Төлеби ауданының Қаратөбе ауылдық округіне арнайы барып, аға буын өкілдеріне медициналық қызмет көрсетті.

Іс-шара барысында қарттардың денсаулығын бақылауға, қажетті медициналық кеңес беруге және аурулардың алдын алуға басымдық берілді. Ақ халатты абзал жандар тұрғындардың денсаулығына қатысты мәселелеріне назар аударып, тиісті ұсыныстарын айтты.

«Денсаулық керуені» секілді көшпелі медициналық шаралар ауылдық елді мекендердегі тұрғындарға қажетті қызметтерді жақындатуға мүмкіндік береді. Әсіресе, егде жастағы азаматтардың денсаулығын тұрақты бақылауда ұстау – маңызды міндеттердің бірі.

Облыстық апталық аясындағы мұндай игі бастамалар аға буынға деген құрметті арттырып қана қоймай, олардың қоғамдағы белсенділігін қолдауға да жол ашады.

 

«Төлеби-ақпарат».