Ленгір қаласындағы №1 мектеп-гимназияның мұғалімі Сәуірбаева Мақпалдың жетекшілігіндегі оқушылар Лесбек Аружан, Нұршапағат Жетібаева, Жұмалы Назерке Астана қаласында алғаш рет өткен «Ана тілі» республикалық зияткерлік қазақ тілі олимпиадасының ақтық кезеңінде өз білімдерін дәлелдеп, ІІІ орынға ие болды. Топтық сайыста жоғары нәтиже көрсеткен «Жауқазын» тобы ІІІ дәрежелі дипломмен марапатталып, қола медальға, естелік сыйлықтарға ие болды.
Биыл алғаш рет ұйымдастырылған бұл жобаны Халықаралық «Қазақ тілі» қоғамы мен «Білім-Инновация» халықаралық қоғамдық қоры бірлесе жүзеге асырды.
Олимпиадаға тіркелу 2025 жылғы 13 қаңтарда басталып, іріктеу кезеңі 8 ақпан күні онлайн форматта өтті. Республиканың барлық өңірінен 5 мыңға жуық 9-11-сынып оқушылары қатысып, білімдерін сынады.
2025 жылғы 20 мамырда олимпиаданың ақтық кезеңіне 64 командадан құралған 192 оқушы Астана қаласына келді. Л.Гумилев атындағы Еуразия ұлттық университетінде өткен олимпиадада қатысушылар үш негізгі бағыт бойынша сайысқа түсті:
- «Пікірсайыс» – тақырып аясында ой бөлісу, дәлел келтіру және қарсы пікірге жауап беру арқылы пікірсайыс мәдениетін дамыту;
- «Тілшілер» – эссе, мазмұндама және талдау жазу арқылы жазу мәдениеті мен ойды еркін жеткізу қабілетін көрсету;
- «Білімпаздар» – ғылым мен білім тақырыбындағы 40 сұрақтан тұратын онлайн-викторинада қатысушылардың жылдамдығы мен алғырлығы сыналды.
Қазылар алқасының құрамында филолог-ғалымдар, «Білім-Инновация» лицейлерінің мамандары, әдіскерлер, сондай-ақ танымал тілші-жазушылар болды.
«Төлеби-ақпарат».
