Аналар мерекесі қарсаңында білім беру саласының ардагері, Қазақ ССР халық ағарту ісінің озық қызметкері, Төлеби ауданының Құрметті азаматы Есенова Гүлбазар Махмудқызы Қазақстан Республикасы Президентінің Жарлығымен мемлекеттік және қоғамдық қызметтегі сіңірген еңбегі, елдің әлеуметтік-экономикалық және мәдени дамуына, халықтар арасындағы достық пен ынтымақтастықты нығайтуға қосқан елеулі үлесі үшін «Құрмет» орденімен марапатталды.
Түркістан қаласында өткен «Әлемнің жарығы – Ана» атты салтанатты жиында облыс әкімі Нұралхан Көшеров ең жарқын мерекелердің бірі – Аналар мерекесімен құттықтап, жылы лебізін білдірді. Осы салтанатты жиында облыс әкімі Гүлбазар Махмудқызының өңіріне «Құрмет» орденін тағып, гүл шоқтарын ұсынды.
Қырық жыл ұстаздық еткен Гүлбазар Махмудқызы бүгінде қоғамдық жұмыстардың бел ортасынан табылып, ылғи да белсенділік танытып, өмірден түйген ойымен, жинаған тәжірибесімен жастармен бөлісуден, оларға ұлттық тәрбие, салт-сананы сіңіруден жалықпайды. Жас ұрпақты жаңақазақстандық патриотизм рухында тәрбиелеу, ұрпақтар сабақтастығын жалғастыру мақсатында аудандағы білім ордаларымен тығыз байланыс орнатып, түрлі іс-шаралар ұйымдастырып тұрады.
Қашанда мәдениетті, кішіпейіл, сыпайы қалпынан айнымайтын Гүлбазар әжей – өзінің сөз саптауымен, жүріс-тұрысымен, мінез-құлқымен үлкен-кішіге үлгі болатын тұлға.
«Төлеби-ақпарат».
