Таиландтың Чиангмай қаласында өткен бокстан Азия чемпионатында Ұлттық құрама команданың спортшысы төлебилік Сағындық Тоғамбай 92 келі салмақ дәрежесінде финалда Тәжікстан боксшысы Парвиз Каримовті айқын басымдықпен жеңіп, Азия чемпионы атанды. Қытайдың Ханчжоу қаласында өткен Азия ойындарының қола жүлдегері алғашқы және екінші раундта қарсыласын есеңгіретіп тастады. Осыдан кейін де ауыр соққыларымен Каримовке ес жиғызбады.
Ұлттық құрама сапында өнер көрсеткен ерлер құрамасы 4 алтын, 5 күміс, 1 қола медаль еншіледі. Ал әйелдер құрамасы 5 алтын медальмен топ бастады.
Төлеби ауданы ішкі саясат бөлімінің «Жастар ресурстық орталығы» КММ директоры Беглан Мақұлбек пен орталық қызметкерлері Азия чемпионын әуежайдан сән-салтанатымен, ән-күйімен, сый-сияпатын жасап күтіп алды. Чемпиондарымыз осындай құрметке әбден лайық.
«Төлеби-ақпарат».
