Ауыл шаруашылығы еңбеккерлерінің екінші форумында Жұмысшы мамандықтары жылына орай еңбек адамдарына айрықша құрмет көрсетілді. Мемлекет басшысы Қасым-Жомарт Тоқаев ауыл шаруашылығы саласының үздік қызметкерлерін марапаттап, олар дың ел экономикасын нығайтуға қосқан зор үлесін атап өтті. Еліміздегі аграрлық саланың дамуы мен азық-түлік қауіпсіздігін қамтамасыз етуге адал қызмет етіп жүрген мамандардың еңбегі жоғары бағаланып, мемлекеттік наградалар табысталды.
Сол үздіктердің қатарында өз ісінің майталманы, төлебилік Аманжолов Нұрбол Орынбасарұлы да бар. Ол мал шаруашылығын дамытуға қосқан үлесі және ауыл экономикасын ілгерілетуге сіңірген табанды еңбегінің арқасында ел Президенті Қ.Тоқаевтың қолынан «Ерен еңбегі үшін» медалін алды. Айта кетейік, бұл награда еліміз бойынша 6 азаматқа бұйырды.
Шопандықты кәсіп еткен «Жомарт» шаруа қожалығының басшысы Нұрбол Орынбасарұлы талай жылдан бері төрт түлікті көбейтіп, ауданның әлеуметтік-экономикалық дамуына елеулі үлес қосып келеді. Оның тәжірибесі, еңбекқорлығы үлкен құрметке ие.
Төлебилік шаруаның ел Президентінің қолынан мемлекеттік награда алуы – ауыл еңбеккерлерінің қоғамдағы орны зор екенінің дәлелі.
Еліміздің аграрлық саласына өз үлесін қосып жүрген Нұрбол Орынбасарұлының еңбегі ауыл шаруашылығында аянбай тер төгіп жүрген барша еңбек адамдарына үлгі болары сөзсіз.
«Төлеби-ақпарат».
